T5erbeesh: Salam | سلام

Tami Elkilani طامي الكيلاني

سلام على الاصحاب الي كانو في يوم قراب و اختفوا من حياتك

سلام على الضي وهروبه إلي يدمر في نفسيتك مهما حاولتي انك متعدليش

سلام على كل حبيب فاتك ولا مقدرش قيمتك

سلام على الايفون الي شاشته تكسرت وخربت يومك

سلام على كل مسلسل تعلقتي بيه وكمل

 سلام على لما تكوني ماشية على حالك وحد يجي من وراك ويحولك كندرتك برجله الغجرية

سلام على كل صدمة مهما كان صغرها

 سلام على المسج الي يوصلك ومترديش عليه، مش لان عندك اَي حاجة ضد الشخص الباعث بس لان الموضوع شوية توو ماتش في الوقت الحالي

سلام على عركات كل يوم ملهمش اَي لزمة مع اختك ولا خوك

 سلام على كل طلعة ولا اَي حاجة مخطتتلها ومصارش منها

سلام على لما يصير منها لكن معندكش نفس تشوفي حد

 سلام على كل غالي فقدتيه

سلام على عدم حيلتك

 سلام على اَي كلام سمعتيه و وجعلك قلبك ومعرفتيش كيف تردي عليه ولا حتى فاهمة عليش وجعك أصلا

 سلام على كل لحضة شينة وقفاتك وخلاتك تتفكري وتقدري قداش اللحضات الحلوة اهم من اَي حاجة ثانية في الحياة

سلام عليك

وعلى معاناتك اليومية

 كل حاجة عمرك حسيتي بيها مش دلع ولا كلام الفاضي

 كل حاجة حسيتي بيها وزمطتيها ونسيتيها ولا بكيتي عليها كوناتك وخلاتك الإنسانة الي هيا إنتي الْيَوْمَ

ردي بالك من روحك

خليك حنينة على نفسك

ملهاش غيرك يفهمها